杨仲文

南昌路浪钱家塘出脚勿多几步路，当年有爿小小个篾竹店，祖孙两个人撑了海图个温饱。中国是竹子个家乡，竹子生长了江南水乡，过去中国人日常器皿当中交关侪是用竹子做个，历史相当悠久，形成了竹文化，讲起来就邪气丰富多彩了。上海以前篾竹店迭个行当主要集中勒南市东门外头，上海城关东门又分大东门小东门，此地原生有处叫篾竹弄，具体啥场化要请教专门研究老城厢个专家教授了。

篾匠师傅靠手里一把篾刀，拿根毛竹砍、锯、切、剖，削磨成长长个竹篾、竹丝，精心编织之后可以做出各式各样竹制品，实用美观，价廉物美。近代塑料制品替代了竹制品，迭个行当就逐渐失传了，交关可惜。其中还剩一小部分升级为工艺品，篾竹匠也戴上了非物质文化遗产项目传承人桂冠，有点人还称作工艺品大师，真正是行行出状元了。

篾竹匠也会得用籘作材料制作籘器，专门做籘器生活个过去叫“扎匠”，迭个同纸扎匠是完全勿同个行当。纸扎匠是用竹篾扎个骨架，外头糊上薄纸头，然后纸头浪写字画画，做出灯笼啊或者彩灯，也有做出“房子车子金山银山”“小兵将军佣人管家”等等，专门烧畀死人用个冥器，是古代殉葬品个进步，就勿多讲了。

一日天迭对祖孙打上下手做了把籘交椅摆了店门口，走过路过大家侪讲好：看看适意坐坐适意。就望来个识货朋友卖个好价钿。

过仔两日来了个上等白相人（流氓），里向一件菊花牌细纱汗衫，外头一套黑个暗花纺绸中装，胸口敞开仔，腰里一根两寸阔个皮带，一只白铜搭扣锃亮，脚浪着双豆沙色洋袜，下头是玄色圆口布鞋，手里捏把尺半长个泥金折扇扇了扇，有点派头。……